Hazrat Khalifatul Masih V (aba) pa bahasa Sinug, sin April 15, 2022

Updated: Jun 4

Puas biyassa sin Hazrat Ameerul Mu’mineen(aba) in Tashahhud, in Ta’awwuz iban in Suratul Fatiha, laung niya bakas ku kiya khutba


Sin limabay yaun in kahalan sin kabuhi sin Sayyidina Abu Bakar(ra), piyakita niya in mga dalil bukti bat wala piyapasakitan niya in mga tau dain ha sabab sin ka-agi nila nagmurtad, piyapasakitan niya sila ay dain ha sabab sin ka-agi sin pagmundu’ ni halaum sin hula’.


Laung sin Huzur(aba) hati niya in Hakam iban in Adil ha masa ini, biya’ na sin Imam Mahdi(as) naka-iyan bat in mga tau amuin nagmurtad ha zaman sin Sayyidina Abu Bakar(ra) sila na yadtu in nagmundu’ halaum sin paghula’. Hiyantang sin Imam Mahdi(as) in kamumulahan iban in kaharubiluhan sin masa amuin dain ha sabab-sabab sajja sin pagmundu nila halaum sin paghula’ amuin masi-masi in isug iban in kamdus sin Sayyidina Abu Bakar(ra) imalup. Liyammahan sajja siya kimita bang maita’ nabiya’ ha yaun in mga tau yaun, sampay siya magpakatangis halaum sin sambahayang. Hiyantang sin anak niya biya’ kan Hazrat A’isha(ra) bat in Sayyidina Abu Bakar(ra) ha panagna-an pa sin khilafat niya ay kikita’ niya na in katan dagbus sin katitipuhan iban in pagmundu ha paghula’, in sakaula-ula bang in bu’gat sin mga katitipuhan halaum sin hula’ yaun hibutang pa ta-as sin kabudburan na malubu’ na sajja in kabudburan sin bu’gat niya. Sumagawa’ dain ha tulung-tabang sin Tuhan, in Sayyidina Abu Bakar(ra) masi-masi in kamdus niya timitindug nagpapas sin katan ginisan sin mga katitipuhan iban sin pagmundu amuin jimajatu ha masa niya.


Laung pa sin Imam Mahdi(as) hati niya ha waktu kiyatukbal na sin Tuhan pa Sayyidina Abu Bakar(ra) in Khilafat, na duun ha ini bang ibarat kassa’ maluhay tuud magkabag-bag in mga bangsa Muslimin, sumgawa’ iyu-utung sin Tuhan in mga bangsa Muslimin dain ha laum sin katigdluman labay dain ha Khilafat sin Sayyidina Abu Bakar(ra), amuin puas man dain didtu, daran na in Sayyidina Abu Bakar(ra) pagbantugun iban laggu-un sin mga tau sarta’ saddiya na sila magta-at kaniya ha unu-unu na kahalan. In katan ini ay dain ha sabab sin pagsabunnal iban kamdus sabar sin Sayyidina Abu Bakar(ra).


Laung sin Huzur(aba) ha waktu sin kusug panguntara’ sin mga tau ini ha shara’ sin Islam, kiyanat sin Sayyidina Abu Bakar(ra) in kusug sin bangsa Muslimin ha mga binaybayan. Karna’ ha masa yadtu aun dain ha mga tau in gimuwa dain ha Islam nagmurtad sarta’ dih na magpamayad zakat, iban aun daisab dain kanila yadtu in asal nagmurtad ubus nanulang pa ha shara’ iban nagtagna’ na magpamunu’ mga bangsa Muslimin. Na duun ha ini in Sayyidina Abu Bakar(ra) nagpa-aun sin mata-mata manungup ha tumpukan sin mga tau ini, iban piyun niya in mga sundalu sin bangsa Muslimin sarta’ diya niya gumuwa dain ha Madinah. Na piyangayu sin Sayyidina Ali(ra) pa Sayyidina Abu Bakar(ra) in sapad-pad laung niya baran mu in magad ha mga kasundaluhan, mas marayaw pa san in mangda-ak na kaw dugaing karna’ makasusa bang aun jumatu kaimu bukun marayaw ha pagbunu-an. Tiyaima’ isab sin Sayyidina Abu Bakar(ra) in pamikil sin Sayyidina Ali(ra) sarta’ diya-ak niya na limanjal in mga kasundaluhan niya ha waktu in siya minuwi magbing pa Madinah.


Laung sin Huzur(aba) hati niya bakas biyahagi sin Sayyidina Abu Bakar(ra) in kasundaluhan sin mga bangsa Muslimin pa 11 bahagi iban sin mga Ameer nila iban in tiyap-tiyap hangka bahagi yaun iban sin panji nila pakaniya-pakaniya. Piyara sila ini pa dugaing-dugaing tampat bang ha-unu nagpalaggu sin tumpukan nila in mga mundu ini itung na in mga sila amuin ha baba-an sin nakura’ nila amuin bakas nagdara-awa Nabi. Nara-ak daisab sin Sayyidina Abu Bakar(ra) in tiyap-tiyap batalyon subay nila hibin in kaibanan dain ha mga Muslim gagandilan ha taikuran nila, ha tampat bang ha-unu sila bakas piyakadtu bat supay masiguru in kasalamatan dain duun. In Sayyidina Abu Bakar(ra) tattap papahatihun sin kakahibal sin tiyap-tiyap batalyon ini iban ka-ingatan niya ra bang in mga batalyon ini mangdaug. In pagmundu’ yadtu ampa timagna’ sin 3 bulan da, iban pagga in mga mundu yadtu nag angan-angan bat in sila yaun makusug amuin kagausan nila papasan in mga Muslimin ku’nu-ku’nu waktu, na wala nila kiyapagsakapan in katartib sin kakahibal sin kasundaluhan sin mga bangsa Muslimin amuin ma-alup nila magbunu’, na dain ha sabab sin yadtu diyaug sila.


Laung sin Huzur(aba) hati niya in ka-agi sin Sayyidina Abu Bakar(ra) nagbahagi sin mga kasundaluhan, timindug in salingkat-lingkat papanaw ha pagnakura’ karna’ in kasundaluhan sin bangsa Muslimin tattap in pagpahati iban in pagsambung laung nila pakaniya-pakaniya minsan in kiya-aunan sin mga batalyon nila yadtu nagdugaing-dugaing na binaybayan. Kiyapinan daisab sin Sayyidina Abu Bakar(ra) mga pilay sundalu sin bangsa Muslimin in Madinah bat supaya kajagahan in mga Markaz nila sarta’ piyaru-un niya in hambuuk tumpukan sin mga sahabat amuin butang ma-as nila karna’ pangasubuhan nila ha unu-unu na pakaradja-an. Alhasil, hababa-an sin pagnakura’ sin Sayyidina Abu Bakar(ra) timindug in ka-amuhan sin pagpamarinta.


Duun ha zaman ini piyarahan sulat ka-agi sin Sayyidina Abu Bakar(ra) in katan amuin naghuhula ha lupa Arab, in halaum sulat yadtu hati niya in siya yaun nagkakahagad ha bakas diyara sin Rasulullah(sa), iban in katan sa suku’ amuin nanghimuting ha yaun na maitung na kuffar. Laung niya in Rasulullah(sa) bakas piyaratung sin Tuhan pa dunya ini nagdara sin kasabunnalan iban mamaita’ bang unu in tungbas sin hinang marayaw iban magpatumtum bang unu in tungbas sin hinang mangi ha adlaw gana-gana. Hisiyu-hisiyu laung niya manaima’ ha Nabi Muhammad(sa) kiyahanughara-an siya sin sahaya panghindu’ dain ha Tuhan. Piyatarrang daisab ka-agi sin Sayyidina Abu Bakar(ra) labay dain ha mga ayat halaum sin Qur’an bat puas na kiyaparagbus sin Nabi Muhammad(sa) in kawajiban niya, na manaikuri da siya biya’ sin ka-agi sin tiyap-tiyap manusiya manaikuri ha dunya ini, damikkian in aku laung niya na biha’ da hayan. Ha farman sin Allah(swt) ha Suratul Anbiyaa’ ayat 35:

Iban wala kami bakas nagpakakkal sin mga manusiya’ amuin naka-una dain kaimu. Bang saupama kaw (O Muhammad) mapatay, mabuhi’ baha’ sila di salama-lama?

Ha Surah Aali Imraan ayat 145 in Allah(swt) nagfarman:

Iban bukun unu bang unu in Nabi Muhammad(sa) malaingkan Rasul sajja. Bunnal tu-ud in katan kaRasul-rasulan naka-una dain kaniya nagkawafat na. Na bang siya mapatay atawakan nabunu’, muwi baha kamu magbing pa tikud-tikud niyu? Iban hisiyu-hisiyu in muwi mabing pa tikud-tikud niya ay dih da siya makarihil mudarat pa Allah(swt) minsan hambuuk unu-unu. Iban tantu tu-ud gandahan sin Allah(swt) in mga tau aun pagsarang shukur.


Laung sin Sayyidina Abu Bakar(ra) hisiyu-hisiyu in mabaya’ sumumba pa Rasulullah(sa) na hati kamu in siya nawafat na. Iban hisiyu-hisiyu in mabaya’ sumumba pa Allah(swt) na hati kamu in Siya buhi salama-lama iban dih magkamatay. Tiya-abbit sin Sayyidina Abu Bakar(ra) in mga tau, amuin papakahagarun sila ha katunggal sin Tuhan iban ha risala amuin bakas diya sin Rasulullah(sa). Laung niya in mga tau magpakadauhat sin hidayat amura in hidayat mismu sin Tuhan. Dugaing laung niya dain du-un, in hinang marayaw sin manusiya mataima’ sajja yan sin Tuhan marayaw bang nila isab taima-un in Tuhan iban in agama sin Tuhan.

Laung sin Huzur(aba) in sulat sin Sayyidina Abu Bakar(ra) ini bakas piyasampay pa tiyap-tiyap nakura sin atu sin Islam sin dugaing-dugaing batalyon nila, iban piyahati niya in mga tau halaum sin paghula’ bat nagpara siya mga sundalu maksud bukun duma magbunu’ buwat malaingkan mana-abbit kanila manaima’ bang unu in hibaita’ ha sulat ini. Sumagawa bang sila sumulang iban lanjalan nila in ngi’ dagbus sin ka-agi nila na wayru-un dugaing pi-un sin mga kasundaluhan sin bangsa Muslimin buat malaingkan umatu na sajja magbunu’.


Damikkian laung sin Huzur(aba) siyulatan daisab sin Sayyidina Abu Bakar(ra) in tiyap-tiyap hambuuk dain ha mga ameer sin 11 batalyon sin mga kasundaluhan sin bangsa Muslimin. Biyayta-an sila in subay sila magpalangay tau marayaw iban dih sila manjari mamunu’ bang sila dumatung pa tampat daratungan nila. Muna-muna subay nila sila ta-abbitun harap pa pag-iman iban papahinangun kanila bang unu in kawajiban nila hinangun. Sumagawa’ bang nila kasayuhan bang in mga tau yaun nanghalipulu na ha agama sin Tuhan iban mamunu’ na kanila na ayaw na sila magduwa-ruwa kumawas sin sanjata nila bugtu-an na in kahalipulu nila iban in kalilingugan nila. Laung sin Huzur(aba) in bunnal niya mga tau ini ay bukun hat sajja mga tau nagmurtad dain ha Islam buat malaingkan sila na ini in mga tau magpamunu’ iban way ngimi’ addat, na dain ha sabab sin ngi kakahinang nila tiyupanan sila sin panara sin Allah(swt) halaum sin Qur’an, hati niya in tungbas sin dusa nahinang subay papagsibu-un. Aun baita’ bat naraak in mga bangsa Muslimin in subay bausun nila sunugun in mga tau ini. In bunnal niya bukun ini parda-akan umum atawa kan pakatilu-agan, karna’ bakas nagsabda in Rasulullah(sa) tunggal Tuhan da in tagakapatut sumiksa amuin kayu’ in pakayun. Ha kahalan ini, kiyatangu-an sajja in pardaakan sin pagsunug karna’ in mga tau amuin tanggung jawab ha dusa nila ay bakas nanunug mga bangsa Muslimin, dain ha sabab yan in parda-akan ini pagparagbus sajja sin ka-adilan iban babausan sibu-sibu’.


Laung sin Huzur(aba) makajari daisab ma-aun in khutba amuin dugaing in maudu’ niya halauman sin bulan Ramadan ini, sumagawa’ lanjalan ku laung niya in maudu’ ha kahalan sin kabuhi’ sin Sayyidina Abu Bakar(ra) apabila siya magpasampay khutba ha susungun. Amin Allahumma Amin.

55 views