Katubtuban istori hi Sa'ad bin Ubadah (ra)

January 17, 2020 Khutba Jumaat sin Hazrat Khalifatul Masih V (aba)


Puas biyassa sin Huzur (aba) in Tashahhud, Ta’awwuz iban in Suratul Fatihah, laung niya: ha adlaw ini hilanjal ku bissarahun in katubtuban istori hi Hazrat Sa’ad bin Ubadah (ra).


Puas sin kawafat sin Rasulullah (sa), in kabayaan sin mga Ansar hi Hazrat Sa’ad bin Ubadah (ra) in mahinang Khalifa karna siya in nakura sin mga Ansar. Ha waktu Hazrat Abu Bakar (ra) man in na-elect bilang Khalifa, duun ha ini nagduwa-ruwa in Hazrat Sa’ad bin Ubadah (ra). puas sin ka-elect kan Hazrat Abu Bakar (ra) bilang Khalifa, nagpara siya message kan Hazrat Sa’ad bin Ubadah (ra) amuin papagbai’atun siya sah wala siya miyaya. In mga raayat niya bakas na nagbai’at sah in siya way. Puas sin kapagmusawwara sin mga advisor sin Hazrat Abu Bakar (ra) piyasaran niya na in Hazrat Sa’ad bin Ubadah (ra), ha kawafat sin Hazrat Abu Bakar (ra), Hazrat Umar bin Khattab (ra) in na-elect bilang Khalifa damikkian wala daisab nagbai’at kaniya in Hazrat Sa’ad bin Ubadah (ra) sah siya naglain harap pa Syria.




In Musleh Mau’ud Hazrat Mirza Bashiruddin Mahmud Ahmad (ra) piyatarrang niya marayaw bang maita’ mahalga’ in pagbai’at pa Khilafat, bang unu in dagbus sin Khilafat iban bang unu resulta sin kakahinang sin Hazrat Sa’ad bin Ubadah (ra) Laung sin Hazrat Musleh Mau’ud (ra) pagga hati niya in Hazrat Sa’ad bin Ubadah (ra) ha pikilan nya amuin na-insultu siya sin wala siya bakas na-elect bilang Khalifa, wala niya hiyalga-an in paghambuukan sin mga bangsa Muslimin amuin mami’ sin Khalifa sarta’ nagmari’ siya, dih siya mabaya’ magbai’at. Nakapamung in Hazrat Umar (ra) ha pasalan kan Hazrat Sa’ad bin Ubadah (ra) laung niya: “Qatal Sa’ad” in hati sin Qatal ini bunuun sah duun ha ini in kamaksuran sin Qatal hati niya bugtuun in parsugpatan sin hambuuk tau yan. Karna’ in Hazrat Umar (ra) wala ra namunu’ kaniya iban wayruun daisab dugaing in bakas namunu’ kaniya dain ha mga sahabat. Dain ha sabab sin ini in kabtangan “Qatal Sa’ad” hati niya bunuun hi Sa’ad, manunjuki bugtuun in parsugpatan iban siya iban dih manjari in mga tiyap-tiyap hambuuk dain kanila yadtu maglungdan-pangun iban siya. Laung sin kaibanan hikayat, masii-masi buhi’ in Hazrat Sa’ad bin Ubadah sampay naubus na in pagkhilafat sin Hazrat Umar (ra) sarta wayruun daisab dain ha mga sahabat in bakas nangmulahi kaniya.


Laung sin Hazrat Musleh Mau’ud (ra): “In kahalga’ sin Khilafat ini biya’ ha ini in hantang niya, hisiyu-hisiyu in mutas dain ha Khilafat malawa na duun kaniya in unu-unu na ginisan sin martabbat.” Laung pa sin Hazrat Musleh Mau’ud (ra), piyatarrang sin Hazrat Khalifatul Masih I (ra) laung niya bang dungdungan in Quran, matampal duun ha ini in panagnaan banta amuna in Iblis. Ha waktu hinang na sin Allah (swt) in Adam (as) bilang Khalifa in nahinang niya magtuy banta amuna in Iblis. Laung pa sin Hazrat Khalifatul Masih I (ra): “in aku ini Khalifa daisab, hisiyu-hisiyu in mahinang ku banta dumagbus na duun kaniya in Iblis.”


Piyatarrang sin Hazrat Musleh Mau’ud (ra) bat in Khalifa ini manjari siya iyanun Ma’moor, hati niya tau bakas naraak sin Tuhan iban manjari daisab iyanun bukun Ma’moor. In Nabi Adam (as) nahinang siya bakas Ma’moor iban Khalifa. In tiyap-tiyap Nabi maitung siya Ma’moor iban maitung daisab siya Khalifa sin Tuhan. Ampa in pardaakan magtaat pa Khalifa ini wajib in hukuman ay duun naka in Khalifa yan Ma’moor atawa bukun. In bunnal niya, aun bukti niya matampal bang maita kita subay magtaat pa duwa yan; subay hipapakita sin kita in pagtaat pa Nabi sin Allah (swt) karna’ siya ini in katudjuhan sin wahi iban sin kasussihan, iban in Khalifa wajib subay pagtaatan karna’ in siya ini bakas kiyawakilan maghijjatul iban magpasaplag sin wahi amuin bakas dimatung diyara sin Nabi. In pagtaat ini subay dih pagduwa-ruwahan iban dih ini makajari butawanan ha sabab sajja sin kalammahan jasmani sin Khalifa. Dih tuud makajari taikuran sin kita in pagtaat amuin bakas na asal biyaktul sin Allah (swt). Ampa in hinang sin Khalifa ini, amuna in magpa-aun sin paghambuukan sin ummat, na dain ha sabab sin ini wajib in subay siya kahagarun.

Laung sin Hazrat Musleh Mau’ud (ra): Jiyari sin Allah (swt) in mga kanabi-nabihan amuin magpakahinang sila kalalammahan bilang manusiya bat supaya kakitaan in pagbiddaan sin parihalan sin Tuhan iban sin pagnabi. Asal-asal kapapanjari sin Tuhan bat in mga kanabi-nabihan ini magpakahinang daisab sila mga kalalammahan bilang manusiya, sarta in Tuhan Rabbul Alamin dih lumamud ha ini. In mga kalalammahan sin manusiya’ mahinang puun bat ma-aun in paghijjatul ha kaibanan harap pa kaamuhan, biya’ sapantun niya aun pag-iyanun Sujud Sahawi hinangun bang in tau yan nalupa halaum sin sambahayang. Na in kasaan biya’ ha ini masuhul mahinang minsan pa in kiya-aunan niya Nabi. Ampa in katan kignul kahibal sin mga kanabi-nabihan halaum palihala’ sin Allah (swt). Ha mga Khulafa’, in katan kignul kahibal nila amuin manunjuki ha hikasambu sin Jama’at halaum na sajja palihala sin Tuhan. Minsan pa in kiya-aunan sin Khalifa yan nakahinang sin kasaan, Allah (swt) na in magpakugdan kaniya karna’ in Khalifa wayruun maksud niya harap pa kangi-an. In kahaupuan niya, in Khalifa ini bukun siya tanggung jawab ha kignut kahibal niya ha parihalan sin Niizam (shara’ amuin dimadagan ha laum sin Jama’at) Allah (swt) in magpa-amu ha ini. Angkanna asal kiyabaita’ bat Allah (swt) tuud in magpa-aun sin Khalifa. Dalam bihadtu bukun saukat na Allah (swt) in nagpa-aun sin Khalifa bat in Khalifa yan dih na magkasa’. In maksud niya duun ha ini, paamuhun kaagi sin Allah (swt) in unu-unu na amuin wala imamu duun ha pamaranan sin Khalifa. Atawakan biya’ ha ini in dagbus niya yan, siguro tuud sin Allah (swt) hati niya wayruun resulta niya pa mangi dain ha unu-unu na kasaan atawa kan kalalammahan nahinang sin Khalifa.


Laung pa sin Hazrat Musleh Mau’ud (ra): minsan unu pa in jumatu subay da tuud kahagarun ha katan pakaradjaan in Khalifa karna’ in ini kalagihan tuud bat supaya mahantap in karagan sin Siyayasat (shara politics) sin Jama’at. Aun kaiban mga tau pagkublaan magtuy bang sila makarungug kabtangan politics ha Jama’at ini, sampay sila mainu-inu iban mabaya’ humati bang unu tuud in maksud ha ini. Ha pandangan sin kamatauran in politics ini bukun marayaw in ma’na niya. Ampa in bunnal niya in kabatangan politics bang ha Lexicon – in Lexicon ini amuna in kitab dumihil mattan ma’na sin tiyap-tiyap kabtangan. Na in kabatangan politics ini bang ha Lexicon in ma’ana niya magparagan shara’ harap pa kaamuhan, magpa-aun sin pamaham apabila huminang sin mga pakaradjaan, nyataun tuud marayaw in shara’ yaun imamu tuud ha tampat niya bat dih ma-aun kahiluhalaan, mamakay sin dalil iban pamaham bat dumagbus in parkala’ amuin patut hinangun, iban magpa-aun sin kapandayan hikahalulay sin kahula’-hulaan ha dunya ini ha kaamuhan niya. In Hazrat Musleh Mau’ud (ra) piyakay niya duun ha ini in kabtangan politics ha (positive connotation) maksud pa marayaw. Manunjuki in politics duun ha ini – kapandayan, ilmu’, panghati, paslud sin pamikil iban kusug amuin hipaglagi bat supaya umamu in kapanaw sin shara’.


Laung pa sin Hazrat Musleh Mau’ud (ra): “.. in hambuuk dain ha mga salaggu-laggu sifat sin mga Khulafa’ amuna in subay nila taayunan iban paragbusun in pamarinta. Amuyan in sabab bang maita subay kita niyu magbai’at pa Khalifa. In Hazrat Sa’ad bin Ubadah (ra) wala siya bakas nagbai’at pa Khalifa, amu ini in sabab bang maita’ in mga sahabat yadtu bukun na biya’ sin kaina tagna’ in kaagi nila magmartabbat kaniya sarta’ bukun na sila makug-makuyag kaniya. Angkanna, in tau nagdara-awa amuin mapatattap niya in gulalan niya iban in kahalan sin kabuhi nya ha wala siya nagbai’at pa Khalifa iban imu-ulin ha Nizam sin Islam tantu in yan nagsulang na tuud iban sin hikayat sin mga bibi-atan sin Islam.

Hi Hazrat Sa’ad bin Ubadah (ra) nawafat siya ha Syria. Halaum sin hikayat nasabbut in siya ini biyunu’ sahbu siya naglilingkud mabaya mangjamban sarta’nawafat da siya magtuy sin pagbunu’ yadtu. In tampat sin kubur niya ini kabakan duun ha kauman pagtawagun Munaiha dapit pa satan masuuk pa daira sin Damascus.

[Translated into Sinug by Tuan Felan S. Heding]

3 views

 

Makipag-ugnayan

 

The Ahmadiyya Muslim Association Inc.

14 Pilar Banzon St. BF Homes Paranaque City, Metro Manila

Telephone: +63 (02) 842 2728

email:

ahmadiyya.ph@gmail.com

 

Zamboanga City Office:

Peace Compound, Pitogo, Sinunuc, Zamboanga City 7000

Telephone: +63 (62) 983 1294

email: ahmadiyyazamboangacity@gmail.com

  • Facebook Social Icon
  • Twitter
  • YouTube

Copyright © 2020 AMA Inc, Philippines