Kalabbihan sin adlaw Jumaat

May 31, 2019




"O kamu mga bar-iman, apabila piyanawag-tawag na in sambahayang ha adlaw Jumuat, pag-us-us na kamu ha pagjikir pa Allah (swt), iban bina niyu naa in usaha niyu. Amu ini in labi marayaw duun kaniyu, bang niyu sajja kiyahahatihan. Na bang ubus na in sambahayang, pagkanat-kanat na kamu pa ginlupaan manglawag karayawan dain ha Allah (swt), iban pataura niyu in pagzikir niyu pa Allah (swt) bat supaya kamu magparuntungan. Sumagawa in manusiya bang nila kikita in pag-usaha atawa in kaliligapan amu yadtu in kadtuun nila, iban pasaran na sajja kaw ha tindugan mu. Pamungan, unu-unu in duun ha Allah (swt) labi marayaw dain sin kaliligapan iban sin pag-usaha, iban in Allah (swt) sarayaw-rayaw dain ha mga mangduduhal rizziqi." (Surah Jumuah 10-12)




Ha mga ayat nasabbut ini, piyatarrang sin Allah (swt) in kalabbihan sin sambahayang Juma’at. Dain ha sabab yan, in pagsakap pagsaddiya ha sambahayang Juma’at nakalandu in halga ha pandangan sin Allah (swt). Laung sin Allah (swt) bang in hambuuk dain katu taniyu taabbitun bat siya makasambahayang Juma’at, subay siya mag-us-us humadir magsambahayang fardu’ Juma’at, minsan biya’ diin in kaligap niya ha pag-usaha niya, bang in pagpasad ha pag-usaha ha adlaw yan amuin mahinang dan malugi kaw milyun-milyun pilak, sari na madtu laung sin ayat ini ayaw kaw magbista sin kalugian mu subay mu ra pahalgaun in humadir kaw sambahayang fardu’ Juma’at, aynakaw magbista pa sin kalugian mu. Bat sabab in madtu kaw humadir pa Masjid ha adlaw Juma’at, dumungug khutba maka gatusan ngaibu karayawan niya dain sin pagdunya mu atawa usaha mu ha adlaw yan. Ampa in bunnal niya tiyu-tiyu da in makapikil sin kahalan ini, amura in mga sila nakahati sin kalagguan iban kalabbihan sin adlaw Juma’at. Laung sin Allah (swt) in tau amuin makahati sin kahalga sin adlaw Juma’at in pangatud nila ha mga pag-usaha atawa ha paglitu-litu yan bukun da biya’ diin in kahalga’ niya.


Dihilan daisab kita niyu sin Allah (swt) kalimayahan mag-usaha, mag-apas sin pagdunya sin kita sumagawa subay ubus in Sambahayang Juma’at. Iban pagbarakatun daisab sin Allah (swt) in usaha sin kita bang kita tattap manumtum Kaniya, in tanda’ niya bang agarunta in kabayaan sin Allah (swt) hiduhal niya katu in paruntungan labi in laggu dain sin naka-una ay duun naka in paruntungan yan ha pagdunya sin kita atawa ha pag-akhirat sin kita.


Laung sin Imam Mahdi (as): In Jumaat ini adlaw Eid daisab siya sarta mahalga’ dain sin dugaing eid paglami-lami. Sah, mataud in wala nakahati sin kasabunnalan sin Eid ini, amuin adlaw kiyaraak sin Allah (swt) hipaglami-lami tiyap-tiyap hangka pitu. Wala sin kamatauran dihilan halga in adlaw ini. Angkanna subay kita niyu maisbat ha kaagi natu manghalgae ha sambahayang Jumaat. Ampa in bunnal niya mataud in dih magparuli ha ini sarta’ luppasun nila na sajjja in Jumaat nila karna’ sin ibug nila sin pagdunya nila. laung sin Allah swt subay hatihun sin manusiya, in unu-unu in dain ha Allah swt amu yadtu in nakalabbi in dayaw iban in laggu niya dain sin mga kapanyapan atawa alta ha dunya ini. Dugaing dain duun in Allah swt siya in mangdirihil rizziki ha manusiya. In parkala ini bukun ula-ula subay tuud in Jumaat dihilan halga kaagi iban isbatun sin tiyap-tiyap bar-iman. Labi luba’ na in kita niyu amuin namaratsaya ha Imam sin waktu natu ini, na ayaw natu pagpahil-pahilun in adlaw Jumaat.


Naka-iyan in Hazrat Khalifatul Masih Awwal (ra) laung niya in mga Ahamdi ini subay sila in mahinang sabunnal-bunnal bar-iman karna sila ini in bakas nanaima’ sin Imam Jaman. Ampa in pamratsaya sin Ahmadiyya ini dumihil kapindahan matun pa laku tabiat amuin tumaayun ha pardaakan sin Allah swt sarta’ anggautaan in mga pardaakan Niya yaun. In pagdunya ini, bukun ini in paunahun sin kita niyu, in paunahun subay sin kita niyu bang unu in kabayaan sin Tuhan natu mari katu’. Laung sin Imam Mahdi (as): in palangay sin kita niyu subay mag-amu ha kabayaan sin Allah swt. Kalagihan tuud duun ha ini asubuhun ta in ginhawa baran taniyu bang hihinang niya ra baha in haq sin Tuhan, ampa in haq sinTuhan ini pa manusiya amuna in subay Siya sumbahun. Ha farman Niya.. wama khalaqtul jinna wal insa illa liya’buduun.. hati niya wala Aku laung sin Tuhan bakas nagpapanjari bangsa jinn iban manusiya malaingkan in subay sila magtag-ipun mari kaku’. Dain ha sabab sin ini wala’ nagbati laul in Allah swt magpasawa katu bang unu in maksud sin kapapanjari Niya katu.


Naka-iyan in Rasulullah (sa) pasalan sin kahalga’ sin Juma’at, laung niya: hisiyu-hisiyu in namaratsaya pa Allah swt iban pa Adlaw mahuli, na subay niya hitindug in sambayang Jumaat bang siya bukun da nasasakit atawa ha tutulakan, iban bang bukun da siya babai atawa bata-bata liyu dain kanila ini wajib kanila in subay nila hitindug in sambahayang jumaat duun ha ginhawa baran nila. laung pa sin Rasulullah (sa): hisiyu-hisiyu in dih magparuli sin Jumaat karna sin hinang niya, karna sin kaligapan niya ha dunya, karna sin pag-usaha niya, na dih daisab in Allah swt magparuli ha mga tau biya ha ini in dagbus. Karna’ magtag-ipun in manusiya iban sin dih in Allah swt masi-masi Tuhan da siya wayruun malawa Kaniya. Dih magkalagihan in Allah swt unu-unu dain katu. In bunnal niya gamman Siya pa in dumihil sin unu-unu amuin kalalagihan sin kita niyu ha wala natu minsan bakas napipikil, na dain ha sabab sin ini piyatumtuman Niya kita in subay kita magsukul matun Kaniya iban mujji Kaniya. Ampa in tungbas sin ibadat ha adlaw Jumaat ini laung sin Rasulullah (sa) lipat manglipat. Dain ha sabab yan bang in bar-iman mabaya’ huminang sin hambuuk dain mga pardaakan sin Allah swt, karna’ bat supaya ma-aun in ulung sin Tuhan kaniya, na hambuuk na dain ha mga pardaakan yan amuna in humadir magsambahayang barjamaah ha adlaw Jumaat, halgaaan in sambahayang ini iban in kaagi magtag-ipun pa Allah swt. Amuna ini in salaggu-laggu ibadat maitung ha pandangan sin Allah swt.


Adapun in mga sila amuin biyu’git nila in adlaw Jumaat ha wayruun sabab, na aun banda’ sin Rasulullah (sa) kanila, hati niya in sila yan siyusalat ha listahan sin Allah swt tarbilang na dain ha mga tumpukan sin manusiya munafiq. Laung niya hisiyu-hisiyu in tuurun niya tinggalan in Jumaat makatu nagsunu-sunu, duun hayan tumbukan na sin Allah swt in pangatayan sin tau yan sin kamunapikan. In parkala ini bukun langug, karna’ bang kiyatambuk na in tumbuk sin kamunapikan ha pangatayan sin manusiya’, tantu wayruun na kapandayan niya huminang sin karayawan sarta’ in karayawan duun ha baran niya yan maglalawa adlaw pa adlaw sampay in ka-aunan niya bang siya mamissara magputing na, bang siya nakajanji dih niya na pagtumanun iban bang siya pag-amatan sin kaibanan dih niya na yaun pasampayun gamman kustawun niya na in amanat yaun. Sarta’ in manusiya’ amuin wayruun sub niya humadir sumambahayang adlaw Jumaat in kamunafikan tantu tumubu na sajja duun ha pangatayan niya.

In mga parkala ini bukun ini ula-ula subay tuud mimikit ha pangatayan sin mga bar-iman in kahalga’ sin adlaw Jumaat. Naraak tuud kita niyu sin Allah swt iban sin Rasul niya amuin tindugan in sambahayang Jumaat. Karna’ laung sin Rasulullah (sa) in manusiya naninggali sin sambahayang Jumaat piya’gangan niya in ginhawa baran niya sumud dain ha lawang sin surga, minsan in kaawnan niya yan bakas surga in bakas tiyakdir kaniya sin Tuhan niya.


In kamatauran sin mga manusiya magsambahayang sila mangayu dua’a karna’ sin miyamaksud nila ha dunya ini, bang in mga dua’a nila yaun wala dimagbus atawakan wala nataima’ magtuy sila madugal pa Tuhan. Tumtumun taniyu in parihalan sin pagdunya ini aun tubtuban iban aun kahinapusanniya, in Allah swt wayruun tubtuban iban wayruun kahinapusan niya. bang Tuhan in liyalawag sin kita tantu hipagbak ta in kasuuk ta maun kaNiya, sah in sharat niya subay bukun pahil-pahil in kaagi ta magparagbus sin pardaakan niya. laung sin Allah swt subay kamu magtag-ipun matun Kaniya sarta’ hatihun in kalagguan Niya. In tau makila ha kumala tantu kiya-iingatan niya in yaun mahalga’ bukun biya’ sin kassa. Na bihan in kaagi sin kita niyu mag-ibadat pa Allah swt labi mahalga dain sin kiyalawaan kita niyu diamond. Na bang biya ha ini in kaagi taniyu magparuli ha pardaakan sin Tuhan tantu in Siya kabakan sin kita.

Kawajiban sin kita niyu amuin bakas nanaima sin Imam Jaman amuin subay maglingkat kaagi natu mag-ibadat pa Tuhan ta Rabbul Alameen. Lanjalan taniyu angkatun in hal sin kaagi natu magsambahayang iban patattapun taniyu in kaagi natu humadir sumambahayang sin sambahayang fardu’ Jumaat. Agarun ta niyu in pamarinta sin Allah swt iban magmuhut-muhut kita niyu magtuyu ha bang mayan kita tarbilang da ha likusan sin mga manusiya’ amuin tattap in kaagi nila manumtum pa Allah swt. Hati niya mangindua’a isab kita niyu bang mayan in kaibanan Yn tumattap na duun ha pangatayan nila in mga waktu ssin ambahayang bat supaya kabakan nila bat aun hati Tuhan nila malasa iban makasi kanila. bang mayan in mga dua’a sin kita niyu iban in sambahayang sin kita niyu umabut pa tubtuban amuin hipagbak natu in mahasutchi Allah. Bang mayan anugharaan kita niyu sin Allah swt kusug iban gaus amuin maparagbus taniyu in daakan sin Tuhan natu Rabbul Alameen.

0 views

 

Makipag-ugnayan

 

The Ahmadiyya Muslim Association Inc.

14 Pilar Banzon St. BF Homes Paranaque City, Metro Manila

Telephone: +63 (02) 842 2728

email:

ahmadiyya.ph@gmail.com

 

Zamboanga City Office:

Peace Compound, Pitogo, Sinunuc, Zamboanga City 7000

Telephone: +63 (62) 983 1294

email: ahmadiyyazamboangacity@gmail.com

  • Facebook Social Icon
  • Twitter
  • YouTube

Copyright © 2020 AMA Inc, Philippines